 |
the wetnurse
the costumed wetnurse, like a blooming flower,
lavishes love and sap for sapless mothers
and all too soon is dried up in the bower.
|
la nena
Ai di de la pelagra, che tete, brassi e cul
jera la dota magra e sola del Friul,
del Feltrin, del Pagoto, del Cador,
la nena la tolea su el so fagoto
col viatico del prete e del condoto
ciapando drio la stela del pastor
la cia del late, che taja le coline
oltre Revine e la Pedemontana
par morir zo in palassi de cita o campagna
dove gnanca 'na siora ga la vena de la cagna.
Passa la prova, soto col bustin,
sgansar e ringansar, latar, cunar,
ninar, incoconarse,
spetar da casa letare co nove del putin
e sofegar intanto nel pianto sul cussin
l'angossa del mal del paese e mal del paron
che s-ciopa a vivar co altre zente e arie,
altro parlar, altro cestir, altri magnari
che te fa stracapir chi che te si a 'sto mondo.
Ciapa el so benservio, rivada l'ora
che come'na sesia svolando al nio,
la nena la tornava a la caseta, al piol,
col peto ransigna e un cuor sgionfo che dol,
mai no volesse Dio che un urlo fondo e scuro
tajasse el siel in do fora par fora
a sentir che la so pora creatura
da mesi jera za fra i angioleti
sensa che i sui ghe lo gavesse scrito
par no secarghe el lare o farlo tristo.
stela del pastor : Venere
vena de la cagna : abbondanza di latte
mal del paese : spaesamento
mal del paron : prostrazione
piol : poggiolo
ransigna : rattrappito